Papel foinsae ba dezenvolvimentu edukasaun iha timor leste, husi estudante IOB Dirce Lilifania

 

          Papel foinsae ba dezenvolvimentu edukasaun iha timor leste

 

Edukasaun mak fundamentu prinsipál iha prosesu tomak konstrusaun estadu-de-direitu demokrátiku ida. Liu-husi edukasaun, bele konstrui ema-nia hanoin, mentál, karákter, koñesimenstu no kompetensia atu bele kontribui ho pozitivamente ba dezenvolvimentu iha nasaun soberanu no independente ida.

Foin-sa’e ka ho termu seluk juventude, nu’udar futuru husi ezistensia nasaun soberanu ida. Bainhira juventude forte no matenek, bele sai hanesan garantia ba ezistensia husi nasaun ne’e rasik. Atu bele sai juventude ne’ebé forte no matenek, presiza tebes fundamentu edukasaun ida-ne’ebé kualidade. Juventude ne’ebé iha edukasaun di’ak, sei sai nu’udar ai-riin importante ba nasaun ida nia kualidade iha konvivensia mundu internasionál.

Timor-Leste nu’udar nasaun direitu demokrátiku, hatúr fundamentu ne’ebé importante tebes iha konstituisaun RDTL ba dezenvolvimentu edukasaun no formasaun juventude sira. Ida-ne’e atu hatudu katak juventude iha papél ne’ebé fundamentu tebes ba prosesu dezenvolvimentu kualidade edukasaun.

Juventudi nia kontribuisaun ba dezenvolvimentu edukasaun hahú kedas iha tempu uluk. Iha pontu prinsipál lima (5) ne’ebé bele hatudu oinsá kontribuisaun juventude sira iha dezenvolvimentu edukasaun.

1)      Juventudi iha istória. Istória luta ba libertasaun pátria iha nasaun barak la-sees husi kontribuisaun ne’ebé juventude edukadu sira iha. Ezemplu iha Timor-Leste, oinsá juventude edukadu sira kontribui sira-nia matenek, forsa, enerjia, tempu no moris tomak, hahú kedas husi 1975 to’o 1999, hodi ikus mai lori duni povu nasaun ida-ne’e moris nu’udar nasaun independente ida. Kontribuisaun juventudi lutadór edukadu sira ne’e ita bele haree husi livru ida-ne’ebé hakerek husi ativisita RENETIL ho títlu “ANTES SEIN TITULU DO QUE SEIN PATRIA” ka “DI’AK LIU LAKON TITLU DUKÉ LAKON PATRIA/NASAUN”. Ida-ne’e edukasaun ne’ebé boot tebes husi juventudi lutadór sira ba juventudi ohin-loron, kona-ba saida mak nasionalizmu no patriotizmu.

2)      Juventudi nu’udar jerasaun kontinuadór. Atu bele garante ezistensia nasaun independente ida, papél juventudi nu’udar jerasaun kontinuadór importante i fundamentu tebes. Nu’udar jerasaun kontinuadór, presiza tebes iha edukasaun ne’ebé di’ak, kualidade no hatudu duni kompetitividade ne’ebé aas iha prosesu kontinuasaun libertasaun povu.

3)      Juventude nu’udar Agent of Changes. Atu bele sai agent of changes, juventudi tenki iha koñesimentu ne’ebé aas, liu-liu iha area sira téknika espesialidade. Atu bele hetan kapasidade iha área téknika espesialidade, nune’e edukasaun hola papél ne’ebé fundametu tebes. Prezidente Áfrika du Súl, Nelson Mandela hateten “education is the most powerfull weapon which you can use to change the world”.

4)      Juventude nu’udar Agent of Development. Juventude iha obrigasaun no responsabilidade ne’ebé boot tebes atu bele sai nu’udar Agent of Development. Atu bele sai agent of developmentu, nune’e juventude sira iha obrigasaun atu kontinua eleva sira-nia kapasidade no kopetensia intelektuál (soft skill nomós hard skill) hodi bele kontribui ba dezenvolvimentu ida-ne’ebé di’ak no kualidade.

5)      Juventude nu’udar agent of modernization. Mundu globalizasaun obriga duni nasaun ida atu bele adapta aan tuir. Juventude iha papél ne’ebé fundementu tebes atu lori modernizasaun ba povu ho responsabilidade ne’ebé aas. Iha matenek na’in balun hateten nune’e” jovens são ecarregados de fazer mudanças na sociedade para mudar em uma direção melhor mudança da humanitaria”.

Pontu lima iha leten, sai hanesan fondasi ne’ebé presiza hatúr iha moris juventude sira-nian. Estadu Timor-Leste haraik oportunidade ne’ebé luan no nakloke tebes ba juventude hotu atu bele eleva sira-nia koñesimentu iha área siensia, teknolojia, no kultura. Iha artigu 59 pontu 4 hakerek momoos kona-ba “ Estadu teni garante ba sidadaun hotu-hotu, tuir sira-nia kapasidade, atu bele hetan eskola (edukasaun) boot kona-ba investigasaun sientífika no habura arte”.

Saida mak juventude bele no tenki halo hakerek nanis ona iha Konstituisaun RDTL artigu 19 kona-ba KLOSAN SIRA, ne’ebé hateten “Estadu sei halo buat hotu-hotu ne’ebé nia bele atu tulun edukasaun, saude, formasaun profionál ba klosan sira”.

Artigu 2 (rua) ne’ebé hatúr iha konstituisaun ne’e atu hatudu katak papel juventude iha dezenvolvimentu edukasaun ne’e importante tebes. Edukkasaun iha nasaun ida bele dehan iha kualidade, bainhira bele hahoris juventude intelektual ne’ebé iha kompetividade.

Ohin loron iha Timor-Leste, ita haree katak juventudi barak seidauk aproveita tempu ne’ebé iha ho didiak ba edukasaun. Juventudi barak lakon sira-nia tempu iha dalan de’it, no mete liu problema krimi nian. Juventudi barak moris no ransu livre, ne’ebé mak ikus mai halakon sira nia futuru. Sira la-hatudu sira-nia aan nu’udar juventudi edukadu, katak joven ne’ebé edukasaun no formasaun di’ak.

Maibé ita mós bele orgullu katak, juventudi barak kontinua foo laran tomak atu aprende no estuda hodi hasa’e no eleva sira-nia koñesimentu edukasaun. Ita mós bele haree katak ohin loron, juventudi barak hili dalan edukadór. Barak mak sai professor (mestri ka mestra), sai dosente iha ensinu superior, sai formadór iha kursu non formál, sai atleta ne’ebé hatudu prestasaun di’ak i halo morin nasaun nia naran. Hirak-ne’e hotu hatudu oinsa mak juventudi nia kontibuisaun ba dezenvolvimentu edukasaun iha Timor-Leste.

Ha’u hakarak hato’o katak papel juventudi ka foin sa’e ba dezenvolvimentu edukasaun iha Timor-Leste, iha momentu ida agora importante no pertinente tebes. Timor-Leste presiza tebes joven ne’ebé matenek, kreativu, inovativu, dedikadu hodi sai nu’udar fundamentu i ai-riin ba dezenvolvimentu nasaun ida-ne’e enjerál. Juventudi ne’ebé kualidade hatudu kontribuisaun ne’ebé kualidade husi formasaun edukasionál ne’ebé nia nia simu. Juventudi ne’ebé kualidade, sei sai duni nu’udar agent of change, agent of developmentu, agent of modernization no liu-liu bele sai jerasaun kontinuadór ne’ebé sei liberta povu nasaun Timor-Leste husi mukit, ki’ak no beik.

ikus, ha’u sita de’it liafuan murak ida husi prezidente Repúblika Indonézia Engeñeru Soekarno ne’ebé hateten nune’e “Berikan aku seorang pemuda berkualitas maka akan aku goncang dunia” Liu-fuan ikus ne’e atu hateten katak, kualidade juventudi la mosu deripenti de’it, maibé mai-husi edukasaun ne’ebé kualidade mós.

 

Obrigadu.